„Фолксваген“ со својот нов прототип Mission Efficiency покажа колку далеку може да се поместат границите на ефикасноста кај електричните автомобили. Возилото постави три светски рекорди, а особено впечатливи се резултатите во аеродинамиката и потрошувачката на електрична енергија.
Најзначаен е коефициентот на отпор на воздухот од само 0,158, што според „Фолксваген“ претставува рекорд за автомобили одобрени за сообраќај. Во идеални услови, при постојана брзина од 68 километри на час, Mission Efficiency постигнал потрошувачка од само 6,48 kWh на 100 километри.
Прототипот покажал висока ефикасност и во реални услови. На официјално документирана траса долга 1.278,36 километри, од Волфсбург преку Полска и Чешка до Виена, просечната потрошувачка изнесувала 7,51 kWh на 100 километри, вклучувајќи ги и загубите при полнењето. Без нив, потрошувачката била 6,89 kWh на 100 километри.
Просечната брзина на патувањето била 67,72 километри на час, а максималната достигнала 138 километри на час. Батеријата со капацитет од 54,9 kWh била наполнета само еднаш, а по пристигнувањето во Виена останале уште околу 164 километри проценет домет.
За резултатите најмногу придонесува аеродинамиката. Возилото има исклучително низок преден дел, активни отвори за ладење, целосно обложена долна страна, покриени задни тркала и посебно обликувани детали на каросеријата.
„Фолксваген“ наведува дека при брзини над 80 километри на час потрошувачката е повеќе од 30 отсто пониска во споредба со стандардната верзија на моделот ID.Polo.
Mission Efficiency користи и технологии наменети за идните сериски модели на германскиот производител. Прототипот има електромотор со моќност од 99 kW, односно 135 коњски сили, како и платформата MEB+ со преден погон.
Автомобилот е долг 4,78 метри, има четири седишта и багажник со зафатнина од 481 литар.
Интересен дел од концептот е и соларниот систем од 370 W вграден во стаклениот покрив и капакот на багажникот. Во зависност од условите, системот може да придонесе за зголемување на реалниот дневен домет за до 30 километри.
Mission Efficiency засега останува прототип, но резултатите покажуваат како комбинацијата од напредна аеродинамика и технологии погодни за сериско производство би можела значително да ја намали потрошувачката на електричните автомобили.
