Фон дер Лајен: Длабоко сум вознемирена од новата руска ескалација во Црното Море

Претседателката на Европската комисија, Урсула фон дер Лајен, изрази длабока загриженост поради новата ескалација на тензиите во Црното Море, откако товарен брод со украински и азербејџански членови на екипажот бил погоден од дрон во близина на романскиот брег.

— реклама —

„Длабоко сум вознемирена поради уште една руска ескалација во Црното Море“, напиша Фон дер Лајен на социјалната мрежа Икс, оценувајќи дека ваквите напади ги загрозуваат животите на цивилите и се спротивни на меѓународното право.

— реклама —

Според медиумските извештаи, товарниот брод „Хорив“, кој пловел под знамето на Коморските Острови, бил погоден од беспилотно летало, по што избувнал пожар. Еден член на екипажот загинал, а по тројца сè уште се трага.

Романското Министерство за внатрешни работи соопштило дека бродот е тешко оштетен, се превртел и постои непосредна опасност да потоне.

— реклама —

Податоците од платформата за следење на поморскиот сообраќај „MarineTraffic“ покажуваат дека бродот испловил од Турција на 21 октомври и се движел кон романското пристаниште Сулина.

Според доставените информации, во текот на месецов со дронови биле нападнати седум товарни бродови во близина на црноморските брегови на Романија и Бугарија, што ги засилило стравувањата дека војната во Украина би можела дополнително да ја загрози безбедноста на пловидбата во регионот.