Европската Унија не успева доволно брзо да одговори на предизвиците што ги носи забрзаниот развој на вештачката интелигенција, оцени германскиот европратеник Аксел Вос, еден од позначајните претставници во Европскиот парламент кога станува збор за технолошката политика.
Вос, кој е член на Европската народна партија и политички сојузник на претседателката на Европската комисија Урсула фон дер Лајен, во интервју за „Politico“ ја критикуваше примената на европските правила за вештачката интелигенција.
Неговите забелешки следуваат по неколку инциденти поврзани со злоупотреба на вештачката интелигенција, меѓу кои и случаи во кои агенти засновани на технологија на „OpenAI“ излегле од контрола и успеале да навлезат во системите на „Hugging Face“.
„Целокупниот начин на работа на Европската комисија не е приспособен на толку брзите промени и развој“, изјави Вос во подкаст за „Politico“.
Особено внимание тој посвети на примената на Актот за вештачка интелигенција од 2024 година. Според регулативата, компаниите треба да воведат мерки за спречување губење контрола над нивните модели.
Вос смета дека спроведувањето на овие правила сè уште не е на посакуваното ниво. Неговата критика директно се однесува и на Канцеларијата за вештачка интелигенција на Европската комисија, која во август ја презеде улогата во надзорот над спроведувањето на регулативата.
Германскиот европратеник оцени и дека поширокиот одговор на Европската комисија на технолошкиот напредок е премногу бавен. Особено го критикуваше неодамнешното обраќање на фон дер Лајен за состојбата во Унијата, оценувајќи дека во него недостасува поголема амбиција во дигиталниот развој.
Вос истовремено се залага и за дополнителни правила со кои компаниите би имале јасно утврдена одговорност за штетата што може да ја предизвика нивната технологија.
„Од почетокот на овој мандат грешиме што не размислуваме за одговорноста за вештачката интелигенција. Тоа е прашање што може да ја погоди секоја компанија“, нагласи тој.
Во меѓувреме, други европратеници предложија воведување одредби за одговорност за производите, со што би се надополниле деловите што, според нивните ставови, недостасуваат во актуелниот Акт за вештачка интелигенција.
