(Фото) Иран објави фотографии: соборен американски дрон вреден 30 милиони долари

Иранската државна телевизија ИРИБ објави фотографии за кои тврди дека ја прикажуваат урнатата американска беспилотна летелица MQ-9 Reaper, која, според Техеран, била соборена од иранската противвоздушна одбрана.

Покрај фотографиите, медиумот објави и порака во која се наведува: „Остатоци од американски дрон на брегот на Иран, на 10.000 километри од САД“.

— реклама —

На фотографиите се гледаат запалени остатоци од летало во пустински предел, од кои се издвојува голем пропелер. Иранските власти тврдат дека станува збор за MQ-9 Reaper – еден од најсовремените американски беспилотни борбени дронови.

— реклама —

Американската војска засега не се огласи по овие тврдења, ниту потврди дека изгубила вакво летало.

MQ-9 Reaper е беспилотна летелица наменета за извидување, собирање разузнавачки информации и изведување прецизни напади. Опремена е со наведувани ракети „Хелфајр“ и ласерски наведувани бомби, а нејзината вредност се проценува на околу 30 милиони долари.

— реклама —

Објавата на Иран доаѓа по новата ескалација на конфликтот меѓу Вашингтон и Техеран. Американските сили во текот на ноќта извршија напади врз повеќе од 80 цели во Иран, наведувајќи дека акцијата е одговор на нападите врз трговски бродови во Ормускиот теснец.

Како одговор, Иран лансираше дронови и ракети кон американски воени објекти во Бахреин и Кувајт, поради што во двете земји повеќепати беа активирани сирените за воздушна опасност.