Додека утринава километарски колони имаше на граничниот премин Евзони за влез од Македонија во Грција, сега сликата е поинаква за возачите кои се враќаат.
Според некои од возачите, грчката гранична контрола се минува за околу пет минути, а скенирањето на пасошите трае само неколку секунди. Застојот, според возачите, се создава на македонската страна од граничниот премин Богородица.
„Излез од Грција према Македонија. Грчката граница на Евзони ја поминавме за пет минути. Скенирањето на пасошите беше буквално 10 секунди. Гужвата е на македонската граница“, наведува читателот кој ја испрати фотографијата до редакцијата.
Фотографијата покажува долги колони возила кои чекаат за влез во Македонија, во екот на продолжениот викенд кога голем број граѓани се враќаат од грчките летувалишта.
Утринава, пак, ситуацијата беше обратна – на Евзони се формираа километарски колони за излез од Македонија и влез во Грција, а чекањата започнаа уште од раните утрински часови.
