Краткото, но интензивно невреме што го зафати Струмичко предизвика повеќе пожари и интервенции на терен, информираат од Територијалната противпожарна единица Струмица.
Пожарникарите интервенирале на повеќе локации, каде што биле пријавени запалени електрични столбови, кабли, електрично броило, шумски пожар, како и паднато дрво на коловоз.
Според информациите, во селото Моноспитово бил запален електричен столб и кабли, а слични интервенции имало и во селата Куклиш и Габрово Балдовци. На улицата „Климент Охридски“ во Струмица било зафатено од пожар електрично броило.
Во селото Банско, екипите интервенирале за отстранување на паднато дрво од патот, додека во селото Дорломбос гаснеле шумски пожар.
Од Противпожарната бригада Струмица информираат дека сите пожари биле навремено локализирани и целосно изгаснати, со што било спречено нивно понатамошно ширење и настанување на поголема материјална штета.
