Несекојдневна глетка го изненадила српски турист додека нуркал во близина на Никити, во Грција. Тој во морето забележал необична риба со големи градни перки кои, кога ги раширува, изгледаат како крилја.
Туристот раскажал дека нуркал со детска маска кога го забележал морското животно на дното. Толку бил изненаден од глетката што веднаш ја повикал сопругата за да ѝ покаже што видел. Наместо воодушевување, таа, според неговото раскажување, се исплашила и се оддалечила.
„Неверојатно и прекрасно е кога ќе ги рашири овие крилја. Ја следев под вода додека можев“, напишал туристот во објава на Фејсбук групата „Грчка инфо“.
Објавата предизвикала голем број реакции, а дел од членовите споделиле дека и самите претходно забележале иста или слична риба во близина на Торони.
Една од членките ја препознала рибата како летечки петел и посочила дека не станува збор за опасен или отровен вид.
Туристот подоцна објаснил дека фотографиите што ги објавил не биле направени за време на неговото нуркање, туку ги пронашол на интернет за да покаже како изгледа рибата што ја сретнал.
Тој навел и дека нурка повеќе од десет години, но дека и покрај искуството, оваа средба успеала да го изненади. Особено впечатливи му биле сините нијанси на рибата и начинот на кој се движи по морското дно, поради што тешко се забележува кога мирува на песокот.
