(Фото) Русија тврди дека украински дрон погодил автобус, меѓу загинатите и 17-годишник

Русија денеска ја обвини Украина дека со напад со дрон врз патнички автобус во Белгородската област усмртила пет цивили, меѓу кои и 17-годишно момче. Според руските власти, уште три повредени лица се наоѓаат во критична состојба.

— реклама —

Гувернерот на Белгородската област, Александар Шуваев, соопшти дека во нападот се повредени вкупно 23 лица. Тој на Телеграм напиша дека дронот намерно го погодил автобусот во градот Шебекино.

— реклама —

„Според првичните информации, во овој нехуман напад загинаа петмина недолжни цивили – четири жени и еден малолетник“, наведе Шуваев.

— реклама —

Украинските власти засега не се огласија по повод овие тврдења, а агенцијата „Ројтерс“ наведува дека не можела независно да ги потврди руските информации.

— реклама —

Белгородската област, која се граничи со украинската Харковска област, од почетокот на руската инвазија во февруари 2022 година често е цел на украински напади. И Русија и Украина постојано тврдат дека не напаѓаат цивилни цели.