Малолетни деца се качуваат на конструкцијата на новиот мост на улицата „Љубљанска“ во Карпош 3, кој сè уште не е пуштен во употреба, предупредува читател на „Скопје1“, кој бил сведок на опасна сцена.
Според неговото сведоштво, околу 17 часот забележал дете високо качено на дел од мостот, но не реагирал од страв дека со довикување може да му го одвлече вниманието и да предизвика несреќа.
„(Вчера) околу 17.00 часот сведочев на оваа случка. По физичкиот изглед од далеку сметам дека станува збор за малолетни деца качени на новиот мост на улица Љубљанска – Карпош 3, кој сè уште не е пуштен во употреба. Искрено, не реагирав бидејќи дечкото беше високо качен и ми беше страв дека ако им довикнам, може да му се одвлече вниманието. Исто така, поради претходни ситуации кога луѓе реагирале кон малолетници, а им било кажано дека тоа не е нивна работа, не сакав да влегувам во конфликт“, вели читателот.
Тој додава дека кога се вратил неколку минути подоцна, децата веќе не биле на мостот, но стравува дека ваквите ситуации ќе продолжат.
„Сметам дека ова не е првпат, а по сè изгледа нема да биде ниту последен. Покрај сите ТикТок предизвици кои постојат на интернет, ваквите ситуации ќе продолжат. Се надевам дека преку вас ќе се апелира до надлежните институции да реагираат, да го обезбедат мостот согласно прописите и на овие висечки држачи да постават дополнителна заштита за децата да немаат пристап“, додава тој.
