„Дали треба да чекаме да се случи несреќа?“: Жителка на Карпош алармира за малолетници кои палат петарди

Жителка на скопската населба Карпош, Марија Михајлова, преку објава на социјалните мрежи алармира за секојдневно фрлање и палење петарди од страна на малолетници, предупредувајќи на опасноста по безбедноста и мирот на граѓаните.

— реклама —

Како што наведува Михајлова, веќе цела недела малолетници во населбата фрлаат и палат петарди, за кои таа се сомнева дека се купени на Бит-пазар, без соодветна контрола на продажбата.

— реклама —

Таа посочува дека жителите секојдневно се изложени на силни детонации, вознемирување и потенцијална опасност, особено имајќи предвид дека во населбата живеат мали деца, повозрасни лица и домашни миленици.

Во објавата таа поставува прашања за тоа кој ја контролира продажбата на пиротехнички средства на малолетници, кој ќе преземе одговорност и каде се надлежните институции.

— реклама —

„Дали навистина треба да чекаме да се случи несреќа за некој конечно да реагира?!“, прашува Михајлова.

Таа упатува апел до родителите и надлежните служби да преземат мерки и да реагираат навреме, нагласувајќи дека петардите не се играчки и дека превенцијата е неопходна за да се избегнат несакани последици.