Карпош добива нов мега парк од 86.000 квадратни метри, поранешната депонија е исчистена

Градоначалникот на Скопје, Орце Ѓорѓиевски, денеска објави дека е во целодневна посета на Карпош, каде заедно со колегата Сотир Лукровски разговарале за приоритетите и проектите што треба да се реализираат во општината.

Ѓорѓиевски посочи дека со општинските служби и неговиот тим биле утврдени следните чекори за заедничките проекти, поддршката од Град Скопје и реализацијата на ветеното во неговата програма за Карпош.

— реклама —

Во рамки на посетата, градоначалникот го посетил и просторот каде што се создава новиот мега парк со површина од 86.000 квадратни метри.

Според Ѓорѓиевски, просторот ќе биде наменет за одмор и рекреација, со нова урбана опрема, детски катчиња, повеќенаменски игралишта, зеленило и сопствена хидрантска мрежа.

— реклама —

Тој посочи дека на ова место со години се наоѓала голема дива депонија, каде, како што наведува, се натрупувал отпад и се палеле кабли.

— реклама —

„На тоа му ставаме крај!“, порача Ѓорѓиевски.

Како што објави, депонијата е исчистена, отстранет е слојот од теренот на кој со години се таложел отпад, а се носи чиста земја. Просторот се подготвува за уредување и засадување ново зеленило.

Ѓорѓиевски најави дека наскоро Карпош ќе добие нов мега парк, кој, како што вели, ќе биде простор за сегашните и идните генерации.

— реклама —

Во рамки на посетата, тој информираше и дека привршуваат градежните активности за пуштање во употреба на мостот на „Љубљанска“, проект кој, според него, неколку години бил закочен.

„Продолжуваме посветено и рамномерно во сите општини. Секој дел од градот заслужува внимание. Секој граѓанин заслужува да ги почувствува промените“, напиша Ѓорѓиевски.