Жители на Карпош самоиницијативно сееа детелина на место каде имаше паднато дрво од невремето

Група жителки се собраа за да посеат ниска детелина на парче земја во близина на паркчето кај улицата Манапо, во Карпош, каде што по силното невреме во текот на летото останала исушена површина без обновено зеленило.

— реклама —

Иницијативата започнала со неколку учеснички, но набргу им се придружиле уште три соседки од околните станбени блокови. Заедничката желба за позелена околина и уреден простор за дружење ги обединила жителките, кои се надеваат дека со овој мал чекор ќе придонесат за поубав изглед на паркчето.

За раззеленување на површината тие избрале ниска детелина, за која наведуваат дека е отпорна на високи температури, има помала потреба од вода во споредба со тревата и не бара редовно косење.

— реклама —

Дополнително, детелината е отпорна на газење и може да придонесе за зголемување на биодиверзитетот, бидејќи нејзините цветови привлекуваат корисни инсекти.

— реклама —

Учесничките упатија благодарност до сите сосетки кои се приклучиле на акцијата, изразувајќи надеж дека детелината успешно ќе никне и ќе ја покрие досега исушената земја.