Црногорската полиција во Никшиќ го уапси 19-годишниот Андреј Танасковски од Македонија, по кого беше распишана меѓународна потерница на Интерпол поради сомнение за обид за убиство.
Според соопштението на полицијата, Танасковски е осомничен дека на 7 август 2025 година, во хотелскиот комплекс „Маестрал“ во Будва, со огнено оружје пукал кон Марко Љубиша, познат како Кан, кој се поврзува со спротивставена криминална група. Во нападот биле испукани два куршума, при што Љубиша се здобил со повреди во пределот на главата.
Акцијата за негово приведување ја спровеле службеници од Регионалниот центар за безбедност „Запад“ со поддршка на Секторот за борба против криминалот. Осомничениот бил пронајден во изнајмен објект во приградска населба во Никшиќ.
Во рамки на истрагата е уапсен и 34-годишен жител на Никшиќ, кој е осомничен дека му помогнал на Танасковски да се крие и да избегне откривање и апсење.
Покрај обидот за убиство, против Танасковски се води постапка и за недозволено држење и носење оружје и експлозивни материи, како и за фалсификување исправа. Според истрагата, тој користел фалсификувана лична карта на име на државјанин на Србија, со која престојувал во хотел додека ги подготвувал криминалните активности.
Црногорската полиција соопшти дека продолжува со интензивни активности за пронаоѓање лица барани по меѓународни потерници и за сузбивање на организираниот криминал.
Според истрагата, Танасковски го следел Марко Љубиша и го нападнал додека се наоѓал на базенот во хотелот. Истражителите сметаат дека му пришол од зад грб и отворил оган, по што избегал од местото на настанот. Марко Љубиша, познат како Кан, во црногорските медиуми се споменува како безбедносно интересно лице и се поврзува со „шкаљарскиот клан“, иако тој ги негирал таквите наводи.
