Франција ја блокира платформата „Полимаркет“

Француската Национална управа за игри на среќа (ANJ) соопшти дека наредила блокирање на пристапот до платформата „Полимаркет“ од територијата на Франција, оценувајќи дека начинот на кој ги прикажува коефициентите претставува рекламирање на неовластена дејност за обложување.

— реклама —

Според регулаторот, почетната страница на платформата во реално време прикажува коефициенти за различни настани на кои корисниците можат да се обложуваат, што според француското законодавство се смета за промоција на нелегално приредување игри на среќа.

ANJ потсетува дека рекламирањето неовластени платформи за обложување во Франција е кривично дело за кое е предвидена парична казна до 100.000 евра. Одговорност можат да сносат и лицата кои јавно промовираат коефициенти или понуди од такви интернет-страници.

— реклама —

Според податоците на регулаторот, во јуни „Полимаркет“ забележал повеќе од 578.000 посети од Франција и околу 205.000 уникатни корисници, иако нема дозвола за работа на францускиот пазар.

— реклама —

Со ова Франција им се приклучува на Германија, Белгија, Холандија, Италија, Шпанија, Португалија, Полска и Швајцарија, кои веќе воведоа ограничувања или блокади за платформите за предвидувачко обложување.

„Полимаркет“ во последните години привлече големо внимание поради можноста корисниците да предвидуваат исходи од политички избори, економски случувања и други актуелни настани. Францускиот регулатор кон крајот на 2024 година отвори истрага откако еден француски трговец оствари повеќемилионска добивка преку предвидување на победата на Доналд Трамп на претседателските избори во САД.

Од „Полимаркет“ тврдат дека не се класична обложувалница, туку пазар на кој корисниците купуваат и продаваат договори поврзани со идни настани. Сепак, францускиот регулатор смета дека ваквиот модел во практика функционира како обложување, бидејќи корисниците вложуваат средства и остваруваат добивка доколку точно го предвидат исходот.