Франција подготви нов законски предлог со кој сака да го ограничи пристапот до социјалните мрежи за деца помлади од 15 години, но овојпат властите го менуваат пристапот – наместо забрана насочена кон конкретни платформи, на удар ќе бидат функциите за кои се проценува дека се штетни или можат да создаваат зависност кај малолетниците.
Изменетиот предлог е испратен до Европската комисија, објави францускиот претседател Емануел Макрон.
„Од првиот ден презедов обврска: ќе ги заштитиме нашите деца на интернет. Ќе одиме до крај“, порача Макрон.
Новиот обид доаѓа речиси еден месец откако францускиот Уставен совет ја отфрли претходната верзија на законот, оценувајќи дека дел од одредбите прекумерно ја ограничувале слободата на изразување и комуникација.
Новиот модел е приспособен на забелешките и на европските правила. Наместо да издвојува конкретни социјални мрежи, Франција сака да регулира десет функции за кои се смета дека можат да бидат штетни или да создаваат зависност кај децата.
Меѓу нив се автоматското пуштање видеа, известувањата во текот на ноќта и можноста малолетниците да комуницираат со непознати профили.
Предлогот ја задржува границата од 15 години, но предвидува исклучок за децата на возраст од 13 до 15 години. Тие би можеле да користат социјални мрежи доколку имаат согласност од родител или старател.
Француската влада засега не планира воведување нов систем за проверка на возраста, туку сака решението да се потпира на постојните правила на Европската Унија за заштита на податоците.
Макрон сака францускиот пристап да прерасне и во пошироко европско решение.
„Оваа заштита мора да стане стандард за сите европски деца“, порача францускиот претседател, повикувајќи ја Европската Унија брзо да напредува кон усогласени ограничувања и правила за функциите на социјалните платформи.
Темата се очекува да биде отворена и на европско ниво, а претседателката на Европската комисија, Урсула фон дер Лајен, треба да зборува за неа во среда во рамки на обраќањето за состојбата на Унијата.
Независна експертска комисија именувана од Фон дер Лајен претходно препорача целосно ограничување на социјалните мрежи за деца под 13 години, со можност за ограничен пристап под родителски надзор или во училиштата, по што пристапот постепено би се проширувал со возраста.
Франција најверојатно ќе го почека ставот на Европската комисија пред да продолжи со следните законски чекори, додека Макрон најавува целосна поддршка за европските мерки за поголема заштита на малолетниците на интернет.
