Франција става крај на несаканите телефонски повици, казните достигнуваат 375.000 евра

Франција од 11 август воведува забрана за несакани телефонски повици за комерцијални цели. Според новите правила, компаниите ќе можат да ги контактираат граѓаните само ако претходно добиле нивна изречна согласност или ако повикот е поврзан со веќе постоечки договор.

— реклама —

Со новиот закон се укинува досегашниот систем, според кој граѓаните мораа сами да ги внесуваат своите телефонски броеви во регистарот „Bloctel“ за да не примаат продажни повици. Француските власти наведуваат дека голем број повикувачки центри не ги почитувале тие правила.

— реклама —

Компаниите ќе мора да докажат дека добиле јасна и доброволна согласност од корисникот, која ќе важи најмногу една година. Во секое време граѓаните ќе можат да ја повлечат согласноста, а компаниите ќе бидат обврзани доказот да го чуваат најмалку три години.

Исклучок ќе има за компании што веќе имаат договорен однос со корисникот и нудат производи или услуги поврзани со тој договор, како и за продажба на претплати за весници, списанија и други периодични изданија.

— реклама —

За прекршување на новите правила се предвидени казни до 75.000 евра за физички лица и до 375.000 евра за компании, за секој незаконски повик. Договорите склучени по вакви повици автоматски ќе бидат неважечки.

Новите мерки предизвикаа загриженост и во Мароко, каде што голем дел од повикувачките центри работат за францускиот пазар, а властите предупредуваат дека би можеле да бидат загрозени меѓу 40.000 и 50.000 работни места.