Црногорската полиција трага по лицето кое синоќа фрлило солзавец за време на концертот на Рики Мартин на централниот плоштад во Подгорица, организиран по повод Денот на независноста на Црна Гора.
Инцидентот се случил околу 23 часот, кога во близина на сцената била активирана рачна канистра со солзавец, што предизвикало краткотрајна паника меѓу присутните граѓани.
Концертот бил накратко прекинат, но по интервенцијата на безбедносните служби продолжил без поголеми проблеми.
Според Милан Делиќ, раководител на оперативно-комуникацискиот центар, полициски екипи извршиле увид на местото и заплениле дел од канистрата, пронајдена во близина на сцената.
Од полицијата најавија дека лицето кое го фрлило солзавецот наскоро ќе биде идентификувано и пронајдено.
