Фронтекс: Речиси 110.000 незаконски преминувања на границите на ЕУ годинава

Бројот на незаконски преминувања на границите на Европската Унија во првите десет месеци од 2026 година е намален за 29 проценти во споредба со истиот период лани, соопшти европската гранична агенција Фронтекс. Во овој период биле регистрирани речиси 110.000 преминувања.

— реклама —

Намалување е забележано на речиси сите мигрантски рути, а еврокомесарот за миграција Магнус Брунер го припишува тоа на засилената меѓународна соработка, реформите и договорите со партнерските земји.

— реклама —

Најголем пад е регистриран на централната медитеранска рута, која ги поврзува Северна Африка и Италија. Источниот Медитеран и натаму е најзастапената рута, преку која се случуваат речиси 60 проценти од незаконските влегувања во ЕУ, но и таму бројот е намален за околу 12 проценти.

Спротивен тренд е забележан во западниот Медитеран, каде што има пораст од 21 процент во споредба со 2025 година. Особено изразени промени има на западноафриканската рута долж атлантскиот брег кон шпанските Канарски Острови.

— реклама —

Иако на оваа рута вкупниот број незаконски преминувања е намален за 13 проценти, во октомври е забележан нагол пораст – бројот бил четирипати поголем отколку во истиот месец минатата година.

— реклама —

Обидите за пристигнување во Европа со небезбедни пловила често завршуваат трагично. Според Меѓународната организација за миграција, повеќе од 2.000 луѓе го загубиле животот во Средоземното Море од почетокот на 2026 година.