Шест мигранти, меѓу кои и едно бебе, загинаа во судир на глисер и грчката крајбрежна стража

Шест мигранти, меѓу кои и едно бебе, загинале во судир на глисер со брод на грчката крајбрежна стража во морето јужно од Агриелија, во близина на островот Лезбос. По несреќата, осум лица биле спасени и пренесени во болница.

— реклама —

Според соопштението на грчката крајбрежна стража, несреќата се случила за време на потера по глисерот, кој превезувал мигранти и се обидувал да избега. При маневрирањето, глисерот удрил во предниот лев дел од пловилото на крајбрежната стража.

— реклама —

Судирот се случил на околу 3,5 наутички милји јужно од Агриелија, на островот Лезбос. Дел од патниците паднале во морето, а осуммина биле спасени. Тие биле пренесени во пристаништето Митилена, а потоа и во Општата болница во градот, каде што им била укажана медицинска помош.

Во спасувачката операција учествувале брод за спасување на отворено море, патролен чамец, три патролни пловила на крајбрежната стража и хеликоптер на грчкото воено воздухопловство. Помош пружил и приватен брод на грчкиот спасувачки тим.

— реклама —

Во рамките на прелиминарната истрага, бил идентификуван и уапсен 37-годишен турски државјанин, кој е меѓу спасените. Тој е осомничен за трговија со луѓе.

Надлежните пристанишни власти ги истражуваат околностите под кои дошло до судирот.