Поранешниот директор на Зоолошката градина во Скопје, Ѓорѓи Галетановски, преку објава на социјалните мрежи одговори на, како што наведе, обвинувањата упатени кон него од страна на Левица, порачувајќи им да не ги „фолираат граѓаните“ и да не го споредуваат ниту со ВМРО-ДПМНЕ, ниту со која било друга политичка структура.
Во својата реакција, Галетановски ги наброја проектите реализирани за време на неговиот тригодишен мандат во Зоолошката градина, посочувајќи дека тогаш биле изградени нови живеалишта за фламинга и пингвини, а во Скопје биле донесени бели лавови, бели волци, зебри и други животни и птици.
Тој наведе дека биле доградени и живеалиштата за слоновите и шимпанзата, како и дека со помош на спонзори биле изградени бетонска ограда и тропска куќа. Според него, во тој период биле реновирани половина од постојните живеалишта, а бил поставен и видеонадзор низ целата Зоолошка градина.
Осврнувајќи се на Дино паркот, Галетановски истакна дека тој бил радост за децата од Македонија и од соседните држави и дека инвестицијата се вратила за краток период преку спонзори и посетители.
„Скопјани памтат дека секоја недела имаше по 10.000 среќни посетители, на кои децата им растеа во ЗОО Скопје. Паметат и среќни вработени, за кои лично се изборив платите да им се зголемат уште кога дојдов таму“, напиша Галетановски.
Тој во објавата ги критикуваше и политичките ставови и дејствувањето на Левица, обвинувајќи ја партијата дека единствена цел ѝ е доаѓање на власт.
„Ние, за разлика од вас, не сме деструктивци и не молчевме кога скопјани немаа јавен превоз“, порача Галетановски.
На крајот од објавата, тој посочи дека не се срами од работните места што ги извршувал надвор од политиката.
„Точно е и не се срамам дека сум работел и во кафани и како менаџер за да имам убав живот и да не си заминам од Скопје. Јас без фотелја можам и знам сè да работам, ама без Скопје – не можам“, напиша Галетановски.
