Потпишан меморандум за модернизација на зоолошките градини во Скопје и Битола
По повод Меѓународниот ден на биодиверзитетот, во Зоолошката градина Скопје беше потпишан меморандум за соработка меѓу Министерството за животна средина и просторно планирање и зоолошките градини во Скопје и Битола, со цел нивна модернизација и усогласување со европските стандарди.Министерот Муамет Хоџа изјави дека соработката претставува пример за градење силни партнерства и нагласи дека целта е овие институции да се трансформираат во современи европски центри за благосостојба на животните, заштита на дивиот свет и едукација на младите.Тој посочи дека преку БИОФОН ќе се обезбедуваат долгорочни финансиски механизми за поддршка на заштитените подрачја, екосистемите и проектите на зоолошките градини.„Мотото на овој ден – ‘Делување локално за глобално влијание’ – нè потсетува дека заштитата на планетата почнува од нашиот сопствен двор“, изјави Хоџа.В.д. директорката на Зоолошката градина Скопје, Катерина Костова, нагласи дека зоолошките градини денес не се само места каде што се гледаат животни, туку и центри за едукација, заштита на биодиверзитетот и подигнување на јавната свест.„Природата не ја наследуваме од нашите предци, ја позајмуваме од идните генерации“, порача Костова.Во рамки на настанот беше организирана изложба на едукативни цртежи изработени од ученици од основни училишта, како и едукативна прошетка низ зоолошката градина, при што децата имаа можност да се запознаат со ендемични животински видови од Македонија и нивната заштита.
Македонија | пред 5 часа
