Гасоводот со Грција се гради, подготовките за поврзување со Србија се во тек

Изградбата на гасоводот со Грција, подготовката за поврзување со Србија и техничките проверки на домашните гасоводни делници се дел од активностите за развој на гасната инфраструктура во Македонија, информираат Министерството за енергетика, рударство и минерални суровини и НОМАГАС.

— реклама —

На интерконекторот со Грција, кој на македонска територија ќе биде долг 68 километри, досега се испорачани 64 километри цевки, заварени се 43 километри, а 18 километри се поставени во ров. Експропријацијата е реализирана 97 проценти, а завршувањето на проектот е планирано за средината на 2027 година. Финансирањето опфаќа инвестициски грант и заеми од Европската инвестициска банка и Европската банка за обнова и развој.

— реклама —

Во меѓувреме, започнати се подготовките за интерконекторот со Србија, предвиден да биде долг 23 километри на македонска територија. По склучувањето на договорот на 27 август 2026 година, почнати се активностите за утврдување на трасата и изработка на проектната документација. Проектот е предвидено да се финансира со сопствени средства на НОМАГАС.

Паралелно се вршат сервисирање, проверка на интегритетот и сушење на гасоводните делници Клечовце–Неготино и Неготино–Битола, по што истите активности треба да продолжат и на делницата Скопје–Тетово–Гостивар. Трите делници се долги вкупно 277 километри, а техничките проверки се неопходни за нивно безбедно пуштање во употреба.

— реклама —

Од Министерството се осврнаа и на реакциите на СДСМ и Левица во врска со ребалансот на буџетот, нагласувајќи дека измените во потпрограмата „Гасификација“ не значат откажување од изградбата на гасоводите. Според нив, средствата што претходно биле планирани биле наменети за набавка и складирање природен гас за стратешки резерви, но реализацијата зависи и од обезбедувањето сигурен транспортен капацитет до Македонија.

Како ограничувачки фактор ја посочуваат достапноста на прекуграничните капацитети кон Бугарија, која влијае врз можноста набавката да се реализира според планираната динамика. Од Министерството порачуваат дека развојот на гасоводната инфраструктура продолжува преку проектите со Грција и Србија, како и преку подготовката на домашните делници за ставање во функција.