Газда Деко може да остане во притвор најдоцна до 3 октомври, потоа следуваат други мерки

Дејан Јованов, првообвинет во судскиот процес за пожарот во дискотеката „Пулс“ во Кочани, во кој загинаа 63 лица, може да остане во притвор најдоцна до 3 октомври годинава. По истекот на тој рок, судот по службена должност ќе му определи дополнителни мерки со кои треба да се обезбеди неговото присуство во понатамошната постапка, потврдија за „Скопје1“ од Основниот кривичен суд Скопје.

Причината е законското ограничување на времетраењето на притворот по оценката на обвинителниот акт. Во предметот за „Пулс“, обвинението било оценето на 3 октомври 2025 година.

„Мерката притвор, определена против првообвинетиот Дејан Јованов, од страна на кривичниот совет е продолжена до 03.10.2026 година, имајќи предвид дека Обвинителниот акт е оценет на 03.10.2025 година и согласно законските одредби мерката притвор може да трае до најмногу една година од оцената на актот“, велат од Кривичниот суд за „Скопје1“.

— реклама —

Од судот појаснуваат дека по истекот на законскиот максимум ќе бидат определени други мерки.

„Со цел да се обезбеди непречено присуство во понатамошниот дел од судската постапка, Судот, согласно досегашната пракса, по службена должност, по истекот на законскиот рок за мерката притвор, определува дополнителни мерки за претпазливост и обезбедување на обвинетиот“, велат од судот.

Кривичниот суд достави детали и за мерките што во моментов важат за останатите обвинети во предметот.

— реклама —

Активна мерка куќен притвор имаат Јане Јанчевски и Ивица Гроздановски. Кај Јанчевски, сепак, минатиот месец бил прифатен предлогот куќниот притвор да биде укинат со гаранција од над 33.000 евра во недвижен имот.

Имотот во моментов е во фаза на впишување под хипотека, а откако постапката ќе заврши, Јанчевски ќе биде пуштен од куќен притвор со дополнителни мерки на претпазливост.

— реклама —

Кај обвинетите Митко Стојанов, Мартин Ѓорѓиев и Стојанчо Димитриев, куќниот притвор веќе е заменет со мерки на претпазливост. Одлуките се донесени на 12 јуни за Стојанов и Димитриев и на 17 јули за Ѓорѓиев.

По поднесени жалби, решенијата се доставени на одлучување во Апелациониот суд, но од Кривичниот потенцираат дека жалбата не го одложува нивното извршување.

За Тодор Јованов, куќниот притвор е укинат откако била прифатена гаранција од 319.154 евра во недвижен имот.

— реклама —

Уште повисока гаранција е прифатена за обвинетиот Беким Хаџиу – 849.602 евра, исто така во недвижен имот.

Од Кривичниот суд нагласуваат дека на сите обвинети на кои им е укинат куќниот притвор им се определени мерки на претпазливост.

„Сите обвинети кои им е укината мерката куќен притвор ги почитуваат мерките на претпазливост и редовно се јавуваат на насрочените судски рочишта“, посочуваат од Основниот кривичен суд Скопје.