Газдата Деко предложен за сведок во судскиот процес против деветтемина полицајци за случајот „Пулс“

Во Основниот кривичен суд Скопје продолжи судењето на деветтемина полициски службеници обвинети за злоупотреби поврзани со дискотеката „Пулс“ во Кочани. На денешното рочиште одбраната ги образложуваше своите доказни предлози, меѓу кои се 16 документи и осум сведоци.

— реклама —

Адвокатот Бранко Колев, бранител на обвинетиот Боби Гидиоски, го предложи и сопственикот на дискотеката, Дејан Јованов – Деко, за сведок. Тој треба да се изјасни за наводите на обвинителството дека на Јованов му била овозможена имотна корист преку плата што ја примал како вработен во период од шест месеци.

— реклама —

Дел од предложените документи се однесуваат на работењето на МВР и СВР Штип, а други на информација за проблемите во дискотеката „Пулс“, за која одбраната тврди дека била прикриена од Гидиоски во периодот кога бил началник на СВР Штип.

— реклама —

Јавната обвинителка Спасенка Андонова најави дека на следното рочиште ќе се произнесе одделно за секој од доказните предлози на одбраната. Судот одлучи расправата да продолжи утре во 12 часот.

Деветтемина полициски службеници се обвинети за злоупотреба на службената положба и овластување поради наводни пропусти при проверките и издавањето согласности за работа на дискотеката „Пулс“. Според обвинителството, тие не ги извршиле целосно потребните проверки за исполнување на безбедносните и законските услови, со што му овозможиле на објектот да добие и да користи лиценца. Обвинетите претходно се изјасниле дека не се чувствуваат виновни.