Градоначалникот на Општина Центар, Горан Герасимовски ги повика граѓаните да присуствуваат на најголемиот хепенинг „Центарски улици 4“, кој ќе се одржи на улица „Македонија“.
Тој посочи дека настанот се организира четврта година по ред и дека буџетот за негово реализирање значително е зголемен во однос на почетоците.
„Овој настан Општина Центар го организира четврта година по ред. Почнавме со многу мал буџет од 30 илјади денари, а денес издвојуваме 1 милион денари токму за овој настан. Во изминатите четири години тројно го зголемивме буџетот за култура, од 4 милиони денари во 2021 година на сегашните 25 милиони денари, што значи повеќе културни содржини во интерес на центарци“, рече Герасимовски.
Според најавите, програмата започнува во 12 часот и ќе трае во текот на целиот ден, со настапи на над 30 уметници, диџеј сетови, ликовна колонија, улични перформанси и живи статуи.
Вечерниот дел од програмата ќе биде заокружен со настапи на Дина Јашари и Тони Зен со бенд, а Герасимовски упати покана до сите граѓани да ја посетат улица „Македонија“ и да ја проследат манифестацијата.
Манифестацијата „Центарски улици 4“ е дел од серијата културни настани со кои Општина Центар го одбележува 50-годишниот јубилеј.
