Градоначалникот на Општина Центар, Горан Герасимовски, изврши увид во реконструкцијата на Основното општинско училиште „Св. Кирил и Методиј“, каде што се реализираат активности за обнова на фасадата и замена на внатрешното осветлување.
Проектот, кој се финансира со заем од Светска банка, има за цел да ја подобри енергетската ефикасност на училиштето и да обезбеди подобри услови за учениците и наставниот кадар.
„На 190-годишнината од постоењето на ООУ „Св. Кирил и Методиј“ инвестираме во негова целосна енергетска обнова. Новата енергетски ефикасна фасада и ЛЕД-осветлувањето ќе придонесат за помали сметки за електрична енергија, подобри услови за учениците и наставниот кадар и поздрава средина. Во овој период наш приоритет се реконструкциите и санациите во сите училишта во Центар, затоа што вложувањето во образованието е вложување во иднината“, изјави Герасимовски.
Со реконструкцијата е предвидено поставување камена волна на површина од речиси 2.000 квадратни метри, како и стиродур околу прозорците и вратите за подобра топлинска изолација. Предвидени се и декоративен малтер, ново колоритно решение, санација на челичните решетки и нови лимени опшивки на кровот.
Паралелно, ќе бидат заменети околу 300 постојни светилки со нови енергетски ефикасни ЛЕД-светилки, што ќе придонесе за намалување на потрошувачката на електрична енергија.
Според планираната динамика, главниот дел од реконструкцијата на фасадата треба да биде завршен до септември, за учениците и наставниците новата учебна година да ја започнат во подобрени услови.
