Градоначалникот на Општина Центар, Горан Герасимовски, ги покани граѓаните на второто издание на „Центарска симфонија“, музички спектакл под отворено небо, кој ќе се одржи утре со почеток во 19:30 часот на „Плочник“ во Градски Ѕид, спроти Владата.
Во гостување во попладневната програма на МРТВ, Герасимовски истакна дека Општина Центар во изминатите години значително ги зголемила вложувањата во културата, при што буџетот за оваа област достигнал 25 милиони денари.
„Како градоначалник, многу инвестирам во културата и културните настани што се организираат во текот на годината. Тоа значи реализација на голем број концерти, изложби и различни културни содржини за сите генерации“, рече Герасимовски.
Тој посочи дека општината нуди разновидна културна програма – од „Патувачкото кино“, наменето за младите, до манифестацијата „Носталгија за корзо“, која ги оживува спомените за старото Скопје.
„Утре нè очекува „Центарска симфонија“, прекрасен настан што се реализира втора година по ред. Ги повикувам сите жители на општината и градот, особено оние кои сакаат да се навратат на духот на 70-тите години и да уживаат во убава филмска и симфониска музика, да ни се придружат“, изјави Герасимовски.
На бесплатниот концерт, кој е поддржан од Општина Центар, ќе настапат оркестарот „Сонора Колектив“, како и вокалните солисти Иван Наумовски и Елена Васова.
Од Општина Центар најавуваат дека и во текот на летниот период ќе продолжат со организирање културни настани и содржини наменети за граѓаните.
