Германија гради нов центар на воената индустрија: Рајнметал инвестира 260 милиони евра

Најголемиот германски производител на воена опрема, Рајнметал, и сојузната покраина Хесен планираат да го прошират центарот на одбранбената индустрија во западна Германија со инвестиции вредни стотици милиони евра, објави агенцијата ДПА.

Премиерот на Хесен, Борис Рајн, и извршниот директор на Рајнметал, Армин Папергер, во четвртокот на аеродромот Касел-Калден потпишале меморандум за разбирање.

— реклама —

Германскиот производител планира во наредните години да инвестира повеќе од 260 милиони евра во својот погон во Касел и во самиот аеродром. Покраината Хесен дополнително ќе обезбеди 25 милиони евра, изјави Рајн.

Покрај проширувањето на погонот на Рајнметал во Касел, плановите предвидуваат воспоставување централно логистичко јадро, центар за обука и центар за тестирање на беспилотни летала на аеродромот Касел-Калден.

— реклама —

Во рамките на проектот ќе биде изграден и логистички магацински простор за поддршка на производството по принципот „точно навреме“ (just-in-time). За таа намена ќе биде обезбедена дополнителна површина од повеќе од 30.000 квадратни метри.

Се очекува проширувањето на иницијативата „Defense Hub North Hesse“ позитивно да влијае и врз добавувачите и компаниите што обезбедуваат услуги во регионот.

— реклама —

Касел и во иднина ќе остане најголемиот европски погон за производство на тенкови, изјави извршниот директор на Рајнметал, Армин Папергер.

Посебен акцент ќе биде ставен на производството на оклопното борбено возило на тркала „Боксер“.

Според плановите, инвестициите долгорочно ќе овозможат отворање на повеќе од 1.000 нови работни места во Касел и Калден.

Рајнметал планира до 2029 година да го удвои бројот на своите вработени – од околу 35.000 на приближно 70.000.