Германските ракети со дострел до 2.000 километри отвораат нова безбедносна дилема во Европа

Франција бара од Германија јасно да ја дефинира стратегијата за употреба на ракетите со долг дострел во евентуален судир со Русија, предупредувајќи дека нејасните правила би можеле да доведат до ненамерна нуклеарна ескалација. Според „Фајненшел тајмс“, Париз стравува дека конвенционален напад врз руска цел би можел да биде погрешно протолкуван од Москва и да предизвика нуклеарен одговор.

Француските и германските претставници разговараат за усогласување на доктрината на Берлин за прецизни напади длабоко на непријателска територија со француската нуклеарна стратегија. Еден француски функционер предупредил дека погрешното толкување на сигналите од Русија би можело да доведе до преминување на нуклеарниот праг без тоа да биде намерата.

— реклама —

Загриженоста на Париз доаѓа во време кога Германија, заедно со Обединетото Кралство, Полска и нордиските и балтичките држави, го проширува арсеналот на оружје со долг дострел. Берлин набавува и развива ракети со дострел од 500 до повеќе од 2.000 километри, со кои би можел да гаѓа цели длабоко на руска територија.

Ова е дел од германските напори за преземање водечка улога во европското вооружување, по руската инвазија врз Украина и зголемената неизвесност околу безбедносните гаранции од САД.

Францускиот претседател Емануел Макрон во март најави разговори со европските партнери за можноста францускиот нуклеарен арсенал да придонесе за нивната безбедност. Париз особено се фокусира на Германија, поради нејзините големи одбранбени планови и предвидениот буџет, кој до крајот на 2030 година би можел да достигне 780 милијарди евра.

— реклама —

Француските претставници сметаат дека е неопходно да се воспостават заеднички правила и јавно да се објасни како би се користело оружјето со долг дострел. Според нив, Франција со години развивала непишани правила за нуклеарното одвраќање, додека Германија нема исто искуство.

Берлин, според висок германски функционер, се согласува дека европските престолнини треба да имаат заедничка доктрина и разбирање за можната ескалација. Тој нагласил дека набавката на оружје за прецизни напади мора да биде проследена со договор за неговата употреба.

— реклама —

Една од можностите е заедничка изјава на Германија, Франција и Обединетото Кралство со која би се утврдил нивниот пристап. Во меѓувреме, Лондон и Берлин разговараат и за заеднички развој на оружје со дострел поголем од 2.000 километри, со можност Франција подоцна да се приклучи на програмата.

Британските претставници нагласуваат дека целта на прецизните напади би била уништување на воени капацитети, како командни центри, логистички јазли, складишта за муниција и фабрики за оружје, а не владини згради или нуклеарни постројки.

Германскиот генерал Инго Герхарц предупредил дека одлуките за ваквите напади мора да се носат во координација со сојузниците во НАТО, бидејќи Русија секоја акција на една членка би можела да ја припише на целата Алијанса.

— реклама —

Воените аналитичари, пак, сметаат дека Берлин мора да ги дефинира целите, овластувањата и правилата за управување со ескалацијата, за оружјето со долг дострел да биде средство за одвраќање, а не причина за опасни недоразбирања.

Германското Министерство за одбрана потврди дека земјата заедно со Обединетото Кралство развива капацитети за прецизни напади длабоко на непријателска територија и дека се разгледува можноста за вклучување на Франција. Од Елисејската палата не одговориле на барањето за коментар.