Новак Ѓоковиќ се пласира во осминафиналето на Вимблдон по победата над Артур Риндеркнеш, а по натпреварот призна дека дуелот бил многу потежок отколку што изгледал според резултатот.
„Во тај-брејкот секој поен е исклучително важен. Против него беше многу тешко да се враќа сервисот, особено во третиот и четвртиот сет. Одлично сервираше, го менуваше ритамот и не ми дозволуваше да влезам во мојата игра. Во тај-брејкот го најдов најдобриот сервис, направив два мини-брејка и го завршив мечот. Имаше многу тензија и нервоза, но среќен сум што победив во четири сета“, изјави Ѓоковиќ.
Тој додаде дека уште пред натпреварот знаел дека го очекува сериозен предизвик.
„Првпат играв против него. Го имав гледано претходно и знаев дека е во одлична форма. Поради тоа бев малку стегнат. Направи сè за да ме извади од зоната на комфор“, рече српскиот тенисер.
Ѓоковиќ зборуваше и за промените во тенисот, оценувајќи дека топчињата денес се значително побавни отколку пред десетина години.
„Многу играчи и тренери зборуваат за тоа. По пандемијата нешто се промени во производството на топчињата. Денес се побавни, па слајсот нема ист ефект како порано. Сè уште е многу корисен на трева, но не останува толку ниско како некогаш“, истакна тој.
Српскиот ас ги смири и стравувањата околу неговата здравствена состојба, откако за време на мечот ја масираше ногата и носеше заштита на рамото.
„Не е ништо сериозно. Само се обидувам да ги активирам мускулите кога ќе почувствувам дека малку се замориле. Засега телото се чувствува добро“, нагласи Ѓоковиќ.
На крајот откри и зошто по победите танцува пред публиката.
„Прво чувствувам големо олеснување што мечот е завршен и што победив. Потоа ја гледам мојата фамилија, особено децата, кои денеска гласно навиваа за мене. Синоќа ќерка ми ми покажуваше неколку танцови движења, па се обидов да ги изведам на теренот. Тоа е мој начин да комуницирам со децата и да ги израдувам“, изјави Ѓоковиќ.
