Градоначалникот на Скопје, Орце Ѓорѓиевски, порача дека Македонија останува цврсто определена кон членство во Европската Унија, но не по цена на својот идентитет, јазик, историја и достоинство.
Во објава по седницата на Заедничкиот консултативен комитет во рамки на Европската Унија, каде што е копретседавач, Ѓорѓиевски истакна дека оваа функција претставува можност гласот на Македонија, македонските општини и граѓаните да биде слушнат во европските институции.
Тој информираше дека на состанокот се разговарало за улогата на локалната самоуправа во процесот на европска интеграција, за зајакнување на соработката меѓу општините, размена на искуства и спроведување на реформите потребни за подобрување на животот на граѓаните.
Според Ѓорѓиевски, отворено биле разгледани и предизвиците со кои се соочува земјата на патот кон ЕУ, вклучително и, како што наведе, блокадите и условувањата од Бугарија.
„Нашата позиција е јасна, цврста и достоинствена – Македонија сака да биде дел од Европската Унија, но не по цена на својот идентитет, јазик, историја и достоинство“, нагласи Ѓорѓиевски.
Тој додаде дека европската интеграција останува стратешки приоритет на државата, но процесот мора да се темели на принципи, еднаквост и меѓусебна почит, а не на уцени и негирања.
Во својата порака, градоначалникот ја потенцираше и улогата на општините во евроинтегративниот процес, оценувајќи дека тие се најблиску до граѓаните и имаат клучна улога во спроведувањето на реформите и приближувањето на локалните стандарди кон европските.
„Македонија има место во Европа. Но Македонија таму треба да влезе исправена, со крената глава и со зачуван македонски идентитет“, порача Ѓорѓиевски.
