Ѓорѓиевски: Повторно е распишан тендерот за 100 автобуси за Скопје

Градоначалникот на Скопје, Орце Ѓорѓиевски, соопшти дека повторно е распишана постапката за набавка на 100 нови автобуси и изрази очекување дека овојпат тендерот ќе биде успешно реализиран.

— реклама —

Во гостување во емисијата „Само интервју“ на Канал 5, Ѓорѓиевски истакна дека обновувањето на автобускиот возен парк е еден од приоритетите на градските власти, а набавката ќе се реализира со поддршка од Владата.

Покрај тоа, Град Скопје планира да обезбеди дополнителни 40 автобуси за идниот брз автобуски систем (БРТ), чија реализација треба да започне следната година.

— реклама —

„Постапките треба да ги завршиме до крајот на оваа година, а од наредната да почнеме со реализација на проектот“, изјави Ѓорѓиевски.

— реклама —

Тој информираше и дека се спроведуваат ревизии и проверки од надлежните институции за одредени предмети, при што најави дека ќе има одговорност доколку се утврдат неправилности.

Во делот на комуналната хигиена, градоначалникот соопшти дека е завршена тендерската постапка за набавка на 40 нови камиони, од кои дел ќе бидат наменети за миење на улиците. Најавен е и нов систем за транспорт на отпад преку претоварни станици, со што треба да се подобри ефикасноста во собирањето и депонирањето на отпадот.

— реклама —

Најавата за нови автобуси доаѓа по неуспешниот претходен тендер, додека јавниот превоз во Скопје со години се соочува со недостиг на возила, доцнења и зголемен притисок од патниците. Според градските власти, новата набавка треба да придонесе за подобрување на услугите и намалување на проблемите во секојдневниот превоз.