Долгогодишната депонија во Радуша денеска се чисти во голема координирана акција, објави градоначалникот на Скопје, Орце Ѓорѓиевски. Според него, се отстранува површинскиот отпад од локацијата, околу која во изминатите денови се појавија тврдења дека би можела да биде загрозена водата од изворот „Рашче“.
Ѓорѓиевски повторно нагласи дека депонијата се наоѓа на неколку десетици километри од заштитената зона на изворот „Рашче“ и, како што наведува, не претставува основа за тврдењата што се ширеле во јавноста.
Иако чистењето на локацијата не е обврска на Град Скопје, градоначалникот вели дека градските служби се вклучиле во акцијата бидејќи, како што посочува, кога станува збор за здравјето и безбедноста на граѓаните, „нема туѓа надлежност“.
Ѓорѓиевски во објавата повторно уверува дека водата во Скопје е безбедна за пиење. Тој наведува дека секојдневно се вршат детални анализи во лабораторијата со која располага ЈП „Водовод и канализација – Скопје“ и оти резултатите, според него, не оставаат простор за паника и ширење страв меѓу граѓаните.
Во однос на информациите што предизвикаа вознемиреност во изминатите денови, градоначалникот соопшти дека лицата што, како што наведува, создале паника, веќе разговараат со надлежните органи.
„Скопје е безбедно и така ќе остане“, порача Ѓорѓиевски, додавајќи дека Градот ќе реагира секогаш кога станува збор за здравјето и безбедноста на скопјани.
