Скопје следната година ќе биде домаќин на Светското првенство во танц, објави градоначалникот Орце Ѓорѓиевски, по повод одржувањето на Европското првенство во танц во главниот град.
Во својата објава Ѓорѓиевски посочи дека во Скопје деновиве престојуваат повеќе од 2.900 танчери од 26 европски земји, кои учествуваат на Европското првенство.
Тој истакна дека му било чест да им се обрати на учесниците и да им посака добредојде во Скопје, оценувајќи дека градот во овие денови е место на кое се среќаваат различни култури и се создаваат нови пријателства преку љубовта кон танцот.
„А најубавата вест е дека нашата танцова приказна продолжува! Со особена гордост најавив дека следната година Скопје ќе биде домаќин и на Светското првенство во танц, големо признание за нашиот град и потврда дека Скопје има капацитет, енергија и амбиција да биде домаќин на најголемите меѓународни настани“, напиша Ѓорѓиевски.
Тој им посака на натпреварувачите успешни настапи и истакна дека се надева оти од Скопје ќе понесат убави спомени и желба повторно да го посетат градот.
„Добредојдовте во Скопје, во градот кој овие денови танцува заедно со Европа, а следната година ќе танцува со светот!“, порача Ѓорѓиевски.
