Скопје во октомври 2027 година ќе биде домаќин на едно од најголемите светски танцови натпреварувања – IDO World HipHop & Breaking Championships, на кое се очекува учество на повеќе од 7.000 танчери од над 40 држави.
Светското првенство ќе се одржува од 4 до 14 октомври 2027 година во Скопје, а во текот на 11 дена во македонската престолнина ќе пристигнат танчери, тренери, судии, официјални делегации и гости од повеќе континенти.
Настанот беше официјално најавен на прес-конференција во „Т Арена“, во рамките на Спортскиот центар „Борис Трајковски“. Најавено е првенство со големи размери, со кое организаторите очекуваат Македонија повторно да го потврди капацитетот за организација на големи меѓународни танцови натпревари.
На прес-конференцијата се обратија организаторот Трајче Петковски, претставници на International Dance Organization – IDO и директорот на „Т Арена“, Данијел Апостоловски.
Беше истакнато дека изборот на Скопје е потврда на довербата што Македонија ја изгради во рамките на IDO, по организацијата на повеќе големи европски и светски танцови настани.
На настанот присуствуваа и претседателот на Македонската асоцијација на модерни танци, Панче Димов, Senior Vice President на IDO, Фиона Џонсон, како и претставници на национални танцови организации од повеќе земји.
Најавено е и продлабочување на соработката со танцови организации од САД и Полска, со цел поголема размена на искуства и дополнително поврзување на македонските танчери и тренери со меѓународната сцена.
Скопје веќе има искуство со организација на големи IDO натпревари. Во 2024 година градот беше домаќин на големо светско хип-хоп натпреварување со илјадници учесници од повеќе од 30 држави.
Само во септември годинава, во СЦ „Борис Трајковски“ се одржа и IDO European Ballet, Jazz, Modern & Contemporary Championships 2026, на кое учествуваа речиси 3.000 натпреварувачи од европските земји.
Организаторите очекуваат првенството во 2027 година да има значење и надвор од спортско-танцовиот дел, со оглед на тоа што во Скопје ќе пристигнат илјадници учесници, тренери, родители, судии и посетители. Според најавите, настанот ќе има влијание и врз хотелскиот и угостителскиот сектор, транспортот, туризмот и локалната економија.
