Ѓорѓиевски со честитка: 11 Октомври е аманет да ја чуваме татковината и да продолжиме да ја градиме

Градоначалникот на Скопје, Орце Ѓорѓиевски, упати честитка по повод 11 Октомври – Денот на народното востание, истакнувајќи ја храброста и жртвата на борците кои се кренале против фашизмот за слободна Македонија.

— реклама —

Во објавата на социјалните мрежи, Ѓорѓиевски порача дека 11 Октомври е датум во кој се собрани гордоста на македонскиот народ, споменот за жртвите и обврската да се зачува слободата.

„Единаесетти октомври е денот кога со гордост се поклонуваме пред храброста на оние што се кренаа против фашизмот, решени да се изборат за слободна Македонија“, наведува градоначалникот.

— реклама —

Тој посочува дека предците верувале во слободата и во правото на македонскиот народ да има своја држава, а нивната жртва, како што истакнува, претставува аманет за идните генерации да ја чуваат татковината и да продолжат да ја градат.

— реклама —

Ѓорѓиевски нагласува дека почитта кон борците се покажува и преку одговорноста во денешно време, со чесни дела, храбри одлуки и заложби за подобар живот на граѓаните.

Во честитката тој повикува на сплотеност, решителност и верба во заедничките можности, нагласувајќи дека на идните поколенија треба да им се пренесат вистината за борбата и жртвата, но и да им се остави држава во која ќе живеат достоинствено и гордо.

„Нека им е вечна слава на сите паднати херои во народното востание и борбата за татковината! Нека ни е честит и вековит 11 Октомври! Вечна да ни е Република Македонија!“, порача Ѓорѓиевски.