Левица со комеморативен настан во Прилеп одбележа 85 години од антифашистичкото востание во Македонија

Левица организираше комеморативен настан во Прилеп по повод 85-годишнината од почетокот на антифашистичкото востание во Македонија, кое започна на 11 октомври 1941 година со вооружената борба против бугарскиот фашистички окупатор.

На настанот присуствуваа претседателот на партијата, проф. д-р Димитар Апасиев, и членот на Президиумот и пратеник, м-р Сашко Јанчев.

— реклама —

Програмата опфати посета на спомен-куќата на народниот херој Кузман Јосифоски – Питу, промоција на реизданието на книгата „Од дневникот на Прилеп 1940–1942“, проекција на документарен филм посветен на 11 Октомври, како и тематско предавање на историчарот Миле Спиркоски за историското значење на востанието и антифашистичката борба.

— реклама —

Во своето обраќање, пратеникот Сашко Јанчев потсети на храброста и решителноста на партизаните, кои тргнале во борба свесни дека можат да ги загубат своите животи.

Тој истакна дека нивната жртва претставува обврска и за денешните генерации, нагласувајќи дека борбата за слобода и за општество ослободено од експлоатација и угнетување треба да продолжи.

— реклама —

Од Левица порачаа дека антифашизмот за партијата не претставува само спомен од минатото, туку и актуелна политичка и класна определба. Според нив, тој подразбира борба против фашизмот, империјализмот, националното угнетување и капиталистичката експлоатација.

Од партијата нагласија дека одбележувањето на 11 Октомври значи зачувување на идеалите за кои се бореле партизаните и продолжување на заложбите за слобода, социјална правда и власт во интерес на народот.

Настанот беше заокружен со пораките: „Слава на народните херои!“, „Слава на антифашистичката борба!“ и „Смрт на фашизмот – слобода на народот!“.