Ѓорѓиевски: Со Франција отвораме нови можности за Скопје 2028

Скопје ги зајакнува културните врски со Франција во пресрет на 2028 година, кога ќе ја носи титулата Европска престолнина на културата. Градоначалникот Орце Ѓорѓиевски соопшти дека е потпишан меморандум за соработка меѓу Фондацијата „Скопје ЕПК 2028“ и Францускиот институт во Скопје, со што се отвора патот за заеднички културни проекти и размена на уметници и експерти.

На потпишувањето присуствувале францускиот амбасадор Кристоф Ле Риголер, директорот на Францускиот институт во Скопје, Грегоар Жислер, и директорот на Фондацијата „Скопје ЕПК 2028“, Марјан Цветковски. Партнерството се воспоставува под високото покровителство на Град Скопје.

— реклама —

Според Ѓорѓиевски, соработката ќе овозможи заеднички уметнички продукции, размена на искуства и развој на културните и креативните индустрии. Целта е македонските уметници да добијат поголеми можности за поврзување со европската културна сцена, а граѓаните на Скопје да имаат пристап до нови, квалитетни и достапни културни содржини.

— реклама —

Посебен акцент ќе биде ставен на соработката со францускиот град Бурж, со кој Скопје во 2028 година ќе ја споделува титулата Европска престолнина на културата. Се разгледува и можноста за организирање „Француска сезона во Скопје 2028“.

Ѓорѓиевски истакна дека целта е културните врски меѓу двата града, уметниците и нивните култури да продолжат и по завршувањето на 2028 година. Како важни показатели за успехот на проектот ги посочи можностите за младите, поддршката за домашните уметници и достапноста на културните содржини за сите граѓани.

— реклама —

Градоначалникот упати благодарност до францускиот амбасадор, Францускиот институт и сите партнери за поддршката и довербата, нагласувајќи дека преку конкретна соработка Скопје има можност да го претстави својот културен идентитет, креативност и уметнички потенцијал пред европската публика.

— реклама —