Вчеравечер пред спортската сала „Борис Трајковски“, голем број обожаватели, пријатели и колеги на Владо Јаневски се собраа за да му оддадат последна почит на легендарниот македонски музичар. Во емотивна атмосфера, присутните во еден глас ги пееја неговите најголеми хитови, испраќајќи го со песните што оставија неизбришлива трага во македонската музика.
Градоначалникот на Град Скопје, Орце Ѓорѓиевски, истакна дека градот размислува за начин на кој достоинствено ќе го одбележи ликот и делото на Владо Јаневски.
„Ќе го паметам по сите оние хитови што ги остави. Беше еден од најголемите скопски фраери. Немаме иницијатива, но денеска веќе разговаравме со тимот во Град Скопје и мислам дека во наредниот период е можно да излеземе со одреден предлог да го одбележиме неговото постоење онака како што заслужил“, изјави Ѓорѓиевски.
