Градоначалникот на Град Скопје, Орце Ѓорѓиевски, присуствуваше на настан по повод 15 Септември – Меѓународниот ден на демократијата, кој се одржа на покана на претседателката на Унијата на жени на ВМРО-ДПМНЕ, Марија Митева.
Како што објави Ѓорѓиевски, на настанот се обратиле и претседателот на ВМРО-ДПМНЕ и премиер на Македонија, Христијан Мицкоски, како и претставници на Владата.
„Демократијата е силна кога секој глас се слуша, а секој човек има можност да придонесе“, напиша Ѓорѓиевски.
Тој посочи дека демократијата се гради секојдневно преку учество, дијалог, почитување на различното мислење и подготвеност да се слушне гласот на народот.
„Политичките партии имаат обврска да отвораат простор за нови идеи, да ја заслужат довербата со дела и да создаваат можности секој да биде двигател на промените“, наведе градоначалникот.
Ѓорѓиевски посебно се осврна на улогата на жените во демократските процеси, нагласувајќи дека тие се „столб на нашата држава и незаменлива сила во нејзиниот демократски развој“.
„Нашите мајки, сопартијки и сограѓанки кои активно учествуваат во овие процеси секогаш ќе ја имаат мојата искрена и безрезервна поддршка. Тие се столб во градењето на демократијата и со своето знаење, храброст и посветеност придонесуваат за поправедно и посилно општество“, порача Ѓорѓиевски.
Тој додаде дека гласот на жените треба да се слуша, нивниот труд да се вреднува, а нивното лидерство да има рамноправно место таму каде што се носат одлуките.
„Поддршката за жените е вложување во иднината на Македонија“, напиша Ѓорѓиевски, упатувајќи честитки до Марија Митева и Унијата на жени на ВМРО-ДПМНЕ за, како што наведе, прекрасниот настан и посветеноста со која го поттикнуваат активното учество на жените во општеството.
„Така се јакне демократијата. Така се гради посилна Македонија!“, порача градоначалникот на Град Скопје.
