Го притискале на градниот кош и вратот, му ставиле перница на глава и го удирале со тупаници: Четворица медицински техничари осомничени за смртта на 32-годишен поранешен атлетичар во Загреб

Случајот со смртта на 32-годишниот Кристијан Јосип Периш во психијатриска болница во Загреб ја потресе Хрватска откако снимки од болничкиот видеонадзор отворија сомнежи дека врз него била применета прекумерна физичка сила од страна на медицинскиот персонал. Четворица медицински техничари се осомничени за тешко убиство.

— реклама —

Периш починал на 21 октомври во психијатриската клиника „Свети Иван“, во загрепската населба Јанкомир, каде што бил примен поради психички тешкотии. Според тврдењата на вработените, тој бил вознемирен и агресивен, поради што повеќе медицински техничари интервенирале за да го совладаат.

Снимките од камерите, до кои дошол „Јутарњи лист“, според објавените информации, прикажуваат како Периш бил врзан за болнички кревет, додека неколкумина вработени го притискале. На видеото, наводно, се гледа и како му ставаат перница врз главата и ја притискаат со колена, а таквата постапка траела повеќе од осум минути. Медиумите пренесуваат дека имало и удари со тупаници, како и притискање на градниот кош и вратот.

— реклама —

Според „Јутарњи лист“, физичкото совладување продолжило и откако пациентот престанал да се движи. Потоа била започната реанимација, но безуспешно. Обдукцијата открила скршени ребра и градна коска, модринки, гребнатини и отоци на мозокот и белите дробови. Забележани биле и траги од убоди со медицински игли. Сепак, конечната причина за смртта сè уште не е утврдена и се очекуваат дополнителни судскомедицински и токсиколошки анализи.

— реклама —

На семејството првично му било кажано дека Периш починал од срцев застој, но неговите блиски се посомневале во тоа објаснување откако ги забележале повредите на главата и вратот. Кривична пријава поднеле на 23 октомври. Според „Индекс“, полицијата ги презела снимките од видеонадзорот на 6 ноември, додека директорката на болницата, Мајда Грах, ги прегледала два дена претходно и следниот ден го пријавила случајот.

Четворицата осомничени медицински техничари се приведени и им е одреден едномесечен истражен притвор. Болницата на сите им дала вонредни откази.

— реклама —

Периш бил поранешен атлетичар, дипломиран кинезиолог и долгогодишен тренер во борење со раце, а на пошироката јавност ѝ бил познат и по учеството во хрватското музичко шоу „Суперстар“. Неговото семејство бара целосно расветлување на случајот и одговорност за сите што учествувале во настаните што му претходеле на неговата смрт. Истрагата треба да утврди кои постапки довеле до трагичниот исход и дали постои одговорност и кај други вработени во болницата.