(Видео) Снимките откриваат што се случувало пред смртта на 32-годишниот поранешен атлетичар во Загреб, инспекцијата утврди пропусти

Здравствената инспекција во Хрватска утврди неправилности во постапувањето со 32-годишниот Кристијан Јосип Периш, кој на 21 октомври почина во Психијатриската клиника „Свети Иван“ во загрепската населба Јанкомир. Надзорот открил недоследности во евидентирањето на мерките за физичко ограничување на пациентот, а отворени се и прашања за одговорноста на директорката и управата на болницата.

„Досега утврдените околности, изјаснувањето на директорката и снимката од видеонадзорот објавена во медиумите отвораат сериозни прашања за постапувањето на здравствените работници, почитувањето на пропишаните протоколи и одговорноста на раководството на клиниката“, соопштила инспекцијата.

Четворица медицински техничари се во истражен притвор поради сомнение за тешко убиство на Периш. На снимката од надзорните камери се гледа како техничарите физички постапуваат кон врзаниот пациент, вклучително и со удари и притискање на неговото тело.

Според наодите на инспекцијата, Периш бил донесен во ургентната амбуланта на клиниката на 21 октомври во 13:36 часот, во придружба на Итната медицинска помош и полицијата. Во текот на попладнето добил терапија и бил физички ограничен со ремени.

Во вечерните часови се појавила потреба од дополнителни мерки за физичко ограничување и дополнителна терапија. Инспекцијата наведува дека за време на овие постапки, кои не биле спроведени согласно со пропишаниот протокол, пациентот доживеал срцев застој. Медицинскиот персонал започнал со реанимација, која подоцна ја продолжила екипа на Итната медицинска помош. Периш починал во 21:26 часот.

— реклама —

Побарана е обдукција, чиј наод сè уште не е целосно завршен. При проверката на медицинската документација и разговорите со достапните вработени, инспекцијата утврдила недоследности во евиденцијата на мерките за физичко ограничување, поради што е потребна дополнителна стручна проверка.

Според објавената хронологија на последниот ден на Периш, настаните започнале околу 14 часот, кога член на неговото семејство ја повикал полицијата и пријавил дека тој е во психички растроена состојба и има параноични мисли. На адресата пристигнале полициски службеници од Седмата полициска станица во Загреб.

Околу 14:15 часот семејството побарало и итна медицинска помош поради влошување на неговата состојба, по што Периш бил примен во Психијатриската клиника „Свети Иван“ во Јанкомир.

Во 15:23 часот полицијата повторно интервенирала во болницата. При разговорот со дежурната лекарка, полицајците го затекнале Периш како мирно седи на клупа, без да дава отпор и без да покажува агресивно однесување.

Околу 17 часот следувала втора полициска интервенција. Тогаш полицајците го затекнале пациентот веќе врзан за кревет, видно замаен и дезориентиран. Лекарката им соопштила дека нема потреба од дополнително полициско постапување.

— реклама —

Најтешкиот дел од настаните, според снимката од видеонадзорот, се случил меѓу 20:02 и 20:12 часот. Периш лежел врзан со ремени околу нозете, рацете и градите. Тројца медицински техничари го притискале кон креветот, еден му го притискал лицето, друг му ставил перница на главата, а двајца со колената му го притискале вратот.

Според извештајот, притисокот продолжил и откако пациентот престанал да дава отпор.

Во периодот меѓу 20:30 и 22 часот, по неуспешните обиди за реанимација, била констатирана смртта на Кристијан Јосип Периш. Инспекцијата наведува дека тој починал во 21:26 часот.

Посебно внимание во извештајот е посветено на постапувањето на раководството на болницата по смртта на пациентот. Директорката Мајда Грах била известена за настанот на 21 октомври околу 22:25 часот. Истиот ден бил составен извештај за случајот, но тој не бил потпишан од сите здравствени работници кои учествувале во постапувањето.

Според нејзиното изјаснување, директорката на 22 октомври усно побарала од информатичката служба да ги зачува снимките од видеонадзорот. Следниот ден била известена дека снимките се зачувани. Сепак, нивното разгледување било извршено дури на 4 ноември, речиси две недели по смртта на пациентот.

— реклама —

Директорката навела дека токму тогаш биле забележани несоодветни постапки на дел од медицинскиот персонал. На 5 ноември биле контактирани полицијата и адвокатот на болницата, а директорката писмено ја известила и надлежната градска служба. Полицијата ги презела снимките на 6 ноември, додека следниот ден биле донесени одлуки за вонреден отказ на тројца медицински техничари.

Инспекцијата посочува и дека директорката изјавила оти непосредно по смртта не се посомневала во неправилности и не била запознаена со обврската за пријавување на ваков настан до Министерството за здравство.

Забелешки има и за обученоста на вработените. На прашањето за обуките за смирување на вознемирени пациенти, директорката навела дека такви обуки биле спроведени само неколкупати во текот на 2024 и 2025 година, што инспекцијата го оценила како недоволно за дејноста на установата.

Инспекцискиот надзор сè уште не е завршен. Надлежните бараат одговори зошто снимките биле прегледани дури по речиси две недели, зошто Министерството за здравство и здравствената инспекција не биле навремено известени и кога за смртта дознал Управниот одбор на клиниката и какви мерки презел.

Дополнително ќе се испитува зошто извештајот за настанот не го потпишале сите вработени кои учествувале во постапувањето, како и дали претходно имало поплаки за некои од вработените и како реагирало раководството.

— реклама —

Од Заводот за итна медицина на Град Загреб ќе биде побарана дополнителна документација и изјаснување од медицинските работници кои учествувале во згрижувањето на пациентот. Собраните материјали ќе бидат доставени до Хрватската лекарска комора и Хрватската комора на медицински сестри за стручна оцена на постапувањето на лекарите, медицинските сестри и техничарите.

Во случајот, адвокатот на семејството, Леон Зрниќ, уште на 23 октомври поднел кривична пријава до надлежното обвинителство поради сомнение за несовесно лекување. Истиот ден побарал и инспекциски надзор од Министерството за здравство, како и зачувување на снимките од надзорните камери.

Хрватската министерка за здравство Ирена Хрстиќ потврдила дека инспекцијата ја примила претставката од семејството на 26 октомври, но навела дека таа лично дознала за случајот дури на 9 ноември. Според неа, болницата го известила Министерството на 7 ноември, повеќе од две недели по смртта на пациентот.

Сè уште остануваат отворени прашањата за постапувањето на обвинителството и здравствената инспекција по добивањето на пријавите од семејството, причините поради кои снимките не биле порано преземени и одложеното разгледување на видеоматеријалот од страна на директорката.

View this post on Instagram