Го прогласиле за мртво, а пет часа подоцна откриле дека дише: Потресен случај со 18-месечно бебе во Аризона

Осумнаесетмесечно момче од американската сојузна држава Аризона било прогласено за мртво по сомневање дека се удавило во семејниот базен, но повеќе од пет часа подоцна вработен во болничката мртовечница открил дека детето сè уште дише. Случајот предизвика сериозни прашања за постапувањето на лекарите, особено по информациите дека полицаец предупредувал дека момчето има пулс.

Малиот Винсент Фјордилино бил прогласен за мртов на 8 февруари, околу 18:20 часот, во медицинскиот центар „Мерси Гилберт“ во Аризона, откако лекарите се обиделе да го реанимираат, пренесува „Ен-би-си њуз“.

Неговата мајка, Алексус Фјордилино, раскажала дека додека последен пат го прегрнувала својот син, ѝ се причинило дека слуша како дише. За тоа го известила лекарот, но тој, според нејзиното сведоштво, ѝ објаснил дека станува збор за последни рефлексни вдишувања и дека продолжувањето на реанимацијата само би го продолжило страдањето на детето.

— реклама —

Верувајќи им на лекарите, мајката се простила од својот син. Меѓутоа, повеќе од пет часа подоцна, кога телото требало да биде преземено од болничката мртовечница, вработен забележал дека момчето дише.

„Го славевме Бога и плачевме. Кога ќе ви кажат дека вашето дете починало, а потоа ќе дознаете дека сепак е живо, тоа е чувство што не може да се опише“, раскажала мајката.

Според полициските документи на кои се повикува локалната телевизија Кеј-пи-ен-екс, еден полицаец за време на интервенцијата се обидел да го предупреди лекарот Арјан Туси дека детето сè уште има пулс.

— реклама —

Во документацијата се наведува дека лекарот наводно го игнорирал предупредувањето, одговарајќи: „Постои причина зошто завршив медицински факултет“.

Семејниот адвокат Џон Бруер тврди дека медицинската документација покажува оти дел од клучните лабораториски резултати, врз основа на кои била донесена одлуката за прекин на реанимацијата, не биле готови во моментот кога детето било прогласено за мртво.

— реклама —

Адвокатот најавил поднесување пријава против лекарот и болницата.

Од медицинскиот центар „Мерси Гилберт“ соопштиле дека безбедноста на пациентите и квалитетот на здравствената заштита се нивни највисоки приоритети. Случајот го оцениле како потресен, но одбиле да откријат дополнителни детали, повикувајќи се на заштитата на приватноста.

Адвокатот на лекарот Туси изјавил дека неговиот клиент сочувствува со момчето и неговото семејство и му посакува понатамошно закрепнување.

Иако Винсент преживеал и сега се наоѓа дома, неговата здравствена состојба е сериозна. Според семејниот адвокат, момчето има тешко оштетување на мозокот и не може самостојно да седи, да лази или да голта.

„Ова сега е сосема поинаков живот. Правиме сè што можеме, но никогаш повеќе нема да биде исто“, изјавила неговата мајка.

Семејството бара одговори како било можно детето да биде прогласено за мртво и пренесено во мртовечница, иако сè уште било живо, како и дали навременото препознавање на знаците на живот можело да влијае врз неговата здравствена состојба.