Едно лице загина при пад на мал авион во близина на аеродромот Чендлер во американската сојузна држава Аризона.
Несреќата се случила во вторникот околу 19:50 часот по локално време, во близина на крстосницата на улиците „Меквин“ и „Квин Крик“. По пријавата, на местото веднаш пристигнале противпожарни и спасувачки екипи, кои со помош на контролната кула ја лоцирале урнатата леталка.
На местото на несреќата било пронајдено телото на едно лице, за кое се претпоставува дека управувало со авионот. Смртта била констатирана на самото место.
Идентитетот на загинатото лице засега не е официјално објавен.
Од противпожарната служба во Чендлер информираа дека во истрагата учествуваат управата на аеродромот, локалната полиција и Федералната управа за цивилно воздухопловство (FAA), која треба да ги утврди причините за несреќата.
