Голем шумски пожар што избувна во јужниот дел на Крит принуди околу 2.000 туристи да ги напуштат своите сместувања, додека грчките власти спроведуваат масовни евакуации за да спречат поголема трагедија.
Најкритична е состојбата во областа Ретимно, каде што силниот ветер придонесува огнот брзо да се шири. Поради опасноста, туристите и жителите од загрозените населби се префрлаат на безбедни локации, а 29 лица, претежно туристи кои се затекнале на плажите, биле спасени по морски пат.
За евакуираните е отворена спортска сала во местото Мирес, во регионот Ираклион, каде што им се обезбедени услови за привремен престој, медицинска помош и неопходна опрема.
Во гаснењето на пожарот учествуваат голем број пожарникари, но силните ветрови и високите температури значително ја отежнуваат интервенцијата. Според информациите од терен, огнената линија се протега на околу 20 километри, а активни пожари има и на островот Парос, како и во други делови на Грција.
Во борбата со огнената стихија загинале тројца пожарникари – двајца на Крит и еден на Пелопонез, додека двајца доброволци се здобиле со полесни повреди.
Грчките власти предупредуваат дека опасноста од нови пожари останува исклучително висока, поради што противпожарните служби се во состојба на максимална готовност.
До граѓаните и туристите е упатен апел строго да ги почитуваат насоките на надлежните служби, веднаш да постапуваат по евентуалните наредби за евакуација и да не се враќаат во областите зафатени од пожар. На оние што престојуваат во хотели им се препорачува да ги следат инструкциите на персоналот и спасувачките екипи, додека патниците кои допрва заминуваат за Грција да ги проверат најновите информации за состојбата со пожарите.
И покрај големите напори на пожарникарите, временските услови и сувата вегетација и понатаму го зголемуваат ризикот од ширење на огнената стихија.
