Голем пожар кај Атина: Евакуирани населби и индустриска зона

Голем шумски пожар денеска предизвика евакуација на индустриската зона во грчкиот град Мегара, кој се наоѓа на околу 45 километри западно од Атина.

— реклама —

Грчката цивилна заштита преку социјалните мрежи ги повика сите вработени да ја напуштат областа и да се упатат кон градот. Претходно беа евакуирани и три помали населени места.

— реклама —

Пожарите на поширокото подрачје западно од Атина и натаму не се ставени под контрола. Пожарникарите се борат со два главни огнени фронта – во близина на планинското село Агиос Нектариос и северозападно од Мегара, и покрај тоа што ветерот ослабна.

Грчките власти предупредуваат дека гаснењето и понатаму е исклучително опасно, а ризикот од нови шумски пожари останува многу висок.

— реклама —

Во неделата, за време на гаснењето на пожарите, загинаа пилот и копилот откако се судрија два противпожарни хеликоптери во близина на Атина. Минатата недела во пожарите на Крит и Пелопонез загинаа уште тројца пожарникари.

— реклама —

Според грчките медиуми, во околината на Атина се уништени стотици куќи, а огнот зафатил околу 10.000 хектари земјиште. Властите најавија дека наскоро ќе започне проценката на штетите за да им биде исплатена финансиска помош на погодените жители.