Голем пожар што избувна во фабрика за пластика во областа Вотаникос во Атина продолжува да гори повеќе од 16 часа, а грчките пожарникари и натаму се борат да го стават огнот под контрола.
Според грчката државна телевизија ЕРТ, пожарот сè уште не е изгаснат поради големата количина запалив материјал складиран во фабричкиот комплекс. Дополнителни проблеми за пожарникарите предизвикало и уривањето на дел од покривот на објектот поради високите температури, што го зголемило ризикот за екипите на терен.
Во пожарот нема повредени лица.
Утринава дошло до повторно разгорување на огнот во едно од складиштата, по што биле ангажирани дополнителни противпожарни сили за да се спречи неговото ширење.
Поради согорувањето на пластични материјали, воздухот во поширокото подрачје е сериозно загаден. Властите ги повикаа граѓаните, особено постарите лица и оние со респираторни заболувања, да го ограничат движењето на отворено и да ги држат прозорците затворени.
Поради интервенцијата на пожарникарите и повторното разгорување на огнот, сообраќајната полиција привремено го запре сообраќајот на дел од улицата „Орфеос“ во областа Егалео.
Причините за избувнувањето на пожарот засега не се познати, а истрагата е во тек.
