Голем пожар на ферибот со 166 камиони и 29 автомобили: Сите лица се евакуирани, товарот остана заробен

Голем пожар избувнал на товарниот ферибот „Blue Carrier 2“ додека пловел кон грчките острови Самос, Кос и Родос, поради што е прекината една од важните товарни линии за снабдување на островите.

На бродот имало 166 камиони, 29 автомобили и 29 лица – 28 членови на екипажот и еден возач на камион. Сите биле евакуирани без повреди, а по спасувањето биле префрлени на Тинос и превентивно прегледани.

— реклама —

Пожарот избувнал во 8:57 часот во петокот, додека бродот се наоѓал северно од Миконос. Огнот се појавил во еден од гаражните простори, а се проверува можноста да започнал од товарно возило. Причината засега не е утврдена.

Во акцијата се вклучени бродови на грчката крајбрежна стража, противпожарни пловила, реморкери и специјализирано спасувачко пловило. Според последните информации, пожарот сè уште бил активен, а приоритет е бродот безбедно да биде извлечен за да се спречи негово наклонување или потонување.

— реклама —

Проблемот веќе се чувствува и во снабдувањето на островите. „Blue Carrier 2“ требало да пристигне на Родос во петокот вечерта, а во камионите се превезувале храна, месо, млечни производи, производи за супермаркети, облека, мебел, опрема и друга стока наменета за Родос и Кос.

— реклама —

Особено загрижува состојбата со ладилните возила во кои имало месо, сирења и други лесно расипливи производи. Дел од товарот најверојатно е оштетен, а транспортните компании веќе пријавиле значителни загуби.

Засега нема потврдена најава за заменски брод што би ја презел целата пратка. Последиците врз снабдувањето ќе зависат од тоа колку брзо ќе се воспостави алтернативен транспорт.

— реклама —

„Blue Carrier 2“ е товарен брод долг околу 162 метри, изграден во 1997 година и дел од флотата на Attica Group. Редовно ги поврзува Пиреја, Сирос, Самос, Кос и Родос.

Грчката крајбрежна стража ја истражува причината за пожарот, додека следните чекори ќе зависат од можноста бродот безбедно да биде одвлечен и од проценката на штетата врз товарот.