Голема напнатост во Ормускиот Теснец: Иран пријави уништени танкери и соборен американски дрон

Иранската Исламска револуционерна гарда соопшти дека четири нафтени танкери биле уништени откако наишле на морски мини во Ормускиот Теснец. Според агенцијата „Тасним“, два брода сè уште се во пламен, додека другите два биле запленети. Овие тврдења засега не се независно потврдени од Би-Би-Си.

Од гардата наведуваат дека бродовите се обиделе да поминат низ забранетата јужна пловна рута. Информацијата доаѓа еден ден откако американски претставници потврдија дека војската на САД извршила напади врз Иран.

— реклама —

Иранската страна претходно соопшти дека во вторникот биле уништени уште три танкери кои наишле на мини, како и дека над Ормускиот Теснец било соборено американско беспилотно летало од типот MQ-9.

— реклама —

Во меѓувреме, претседателот на иранскиот парламент и главен преговарач, Мохамад Багер Галибаф, ги оцени изборните резултати во САД како порака дека американските граѓани не ја поддржуваат војната. Тој порача дека Вашингтон не треба да ја игнорира волјата на сопствените граѓани и предупреди дека нова стратешка грешка на САД би можела да отвори ново бојно поле.

Американскиот претседател Доналд Трамп призна дека слабите изборни резултати на републиканците делумно се поврзани со војната во Иран и зголемувањето на цените на горивата, но истакна дека не жали за одлуката да го започне конфликтот. Во интервју за Си-Би-Ес изјави дека војната ќе заврши „кога јас ќе кажам дека е крај“.

— реклама —

Трамп, исто така, порача дека САД се подготвени за нови напади доколку биде потребно, додавајќи дека Иран никогаш нема да поседува нуклеарно оружје.

— реклама —

Во меѓувреме, преговорите за завршување на конфликтот, кој започна во февруари со заедничките американско-израелски напади врз Иран, и натаму се во застој. Иранскиот претседател Масуд Пезешкијан изјави дека неговата влада се обидувала кризата да ја реши преку дијалог и предупреди дека никој нема да има корист од продолжување на војната.

Техеран најави дека Ормускиот Теснец ќе биде повторно отворен само доколку САД ги прифатат условите од иранскиот мировен план. Според портпаролот на Министерството за надворешни работи, Есмаил Багаеи, планот содржи седум точки и би можел да се спроведе во рок од два дена доколку Вашингтон даде согласност.