Големиот пожар на Парос сè уште не е изгаснат, силните ветрови ја отежнуваат битката со огнот

Пожарникарските екипи и денеска продолжуваат со напорите за ставање под целосна контрола на големиот шумски пожар што избувна на грчкиот остров Парос. Иако ситуацијата е подобрена, властите предупредуваат дека силниот ветер и активните жаришта сè уште претставуваат сериозна опасност, објави „Катимерини“.

— реклама —

Пожарот избувна во вторник во близина на депонијата во областа Камби, а во текот на ноќта се прошири кон Агаирија и Трипити, на југозападниот дел од островот.

Портпаролот на противпожарната служба, Јанис Артопиос, изјави дека во моментов нема населени места кои се директно загрозени, но нагласи дека екипите остануваат на терен за да спречат повторно ширење на огнот.

— реклама —

Во гаснењето се вклучени два авиона „Канадер“, два противпожарни хеликоптери и бројни копнени екипи. Според локалните власти, пожарот во голема мера е локализиран во областите Фарангас и Трипити, но на повеќе места сè уште гори ниска вегетација.

— реклама —

Засега нема официјална проценка за евентуалната штета врз објектите, бидејќи во погоденото подрачје има повеќе викендички и расфрлани куќи.

По избувнувањето на пожарот беа евакуирани неколку населени места. Преку системот за итни предупредувања 112, жителите беа повикани навремено да ги напуштат своите домови и да се упатат кон безбедни локации.

— реклама —

Властите остануваат во состојба на висока готовност, бидејќи Парос и натаму е под висок ризик од пожари, а најавеното засилување на ветерот може дополнително да ја искомплицира состојбата.